#基進人觀點 文／楊欣怡、翁渙瑤、許毅全
「所以第七粒行星就是地球。」
「地球毋是凊彩彩一粒行星爾爾！……」
「……知影地球到底有偌大，我會使共恁講」
「咧發明電火進前，這六大洲，攏總需要四十六萬兩千五百十一个遮大陣的人來點路燈。」
這是佇台灣基進中彰投黨部上尾一節台語課的口語練習，每一个學員輪流讀出《小王子》台語版的第16章。阮佇遮六禮拜中間，逐家作伙學習台語的口說、拼音佮正字，學員有的是母語家庭、有的是客語使用者，逐家利用著工課làng-phāng的時間來上課，就是希望佇推捒母語的工事頂懸，作伙出一點仔力。
佇母語復振這一條路頂懸，台灣基進每一个黨部攏用著無仝款的方式leh努力，台北、中彰投、台南、高雄佮屏東黨部捌辦過母語的親子活動佮講座，台語文課程佇中彰投、嘉義、台南佮高雄攏有開過，其他閣有佮各地方母語協會合作辦活動，或者是舉辦台灣年節的活動。
今年，台灣基進佇自由時報發表過文章，阮認為母語復振上重要的關鍵，毋若是予會曉講母語的人變濟，閣較重要的是用母語佇社會頂頭盤撋的人越來越濟，語言的復振，上重要的佇生活頂懸的使用。（華文同步：母語復振最重要的關鍵，就是讓活躍的流利語者（fluent speaker）數量增大於減，而且互相靠近，語言才能復振。）
台灣基進一直以來，堅持用母語來論政，母語自本就是咱生活咧使用的語言，用逐家聽有的語言來討論政治，是阮堅持嘛感覺真重要的代誌，阮認為，母語毋但是生活的語言，嘛應該是士農工商專業的語言，按呢母語才會當繼續活落去，佇台灣基進每一位有志的拍拚之下，阮向望每一个台灣基進的黨部，攏是予母語這粒種子發穎的所在。
就親像《小王子》內底講的，母語復振這項大工程，是需要一大陣人作伙來點路燈的。
